તપસ્વી સારસ્વત

બેઠી દડીનો હલકો પાતળો શરીરનો બાંધો, ઘઊંવર્ણો વાન, ચપળ આંખો અને અણિયાળું નાક, કપાળ પર હંમેશા ચમકતું ચીપીયા જેવું કુમકુમનું તિલક, કસવાળી વૈષ્ણવી બંડી, ઢીંચણથી થોડે નીચે સુધીનું ધોતિયું, માથે જરા ત્રાંસી મૂકેલી કેસરી ટોપી, ક્યારેક ગળે વીંટાળેલો કેસરી ઉપરણાનો ખેસ અને પગમાં રબ્બરની સ્લીપર કે ચંપલ પહેરેલી 100 વર્ષની ઊંમર વટાવી ચૂકેલી વૃદ્ધા કાયા, હાથમાં લાકડી લઈને અમદાવાદની સડક પર પુષ્ટિસંપ્રદાયની હવેલી તરફ દેવદર્શન કે કીર્તન માટે ઉતાવળી ચાલે જતા જુઓ તો આ શાસ્ત્રીજી જ છે એમ કોઈ પણ તરત ઓળખી શકતા હતાં.